|
|
رۆلێ بریكارێن كۆمپانیێن بیانی د پێشڤهبرنا بازاری دا
رۆلێ بریكارێن كۆمپانیێن بیانی د پێشڤهبرنا بازاری دا
2010-02-07
دهۆك، زهری نهوزاد:
|
|
|
بریكار بهرههمێ كومپانیا بهرههمهینهر دپارێزیت، نهد بهرژهوهندیا گشتی دایه كومپانیهكێ دو بریكار ههبن د ئێك وهلات دا، ئهگهر بریكار بهایێن فرۆشتنێ بلند بكهت كومپانی ژی ژلایێ خۆڤه بلند تر لێ دكهت، ئهگهر ئێك بریكار ههبیت دێ قۆرخكرنێ دبازاری دا پهیدا كهت.
حهجی مهشهود ئهمین ل دۆر بریكارێن ئاهێن خوارنێ و جیاوازیا د ناڤبهرا بریكارێن ئێكانه و كومهكا بریكارا دا ههی، كو بتنێ ئهو بریكارێ كومپانیا ئولكهره، دیار دكهت كو كهسێ ئێكێ یێ سودمهند د تایبهتكرنا بریكاراندا، كومپانیا بهرههمهینهره ژ بهركو كهل و پهلێن وێ بێ بها نابیت دهما كو ئێك بریكار د وی وهلاتی دا ههبیت.
ژ لایهكێ دی ڤه ئهندازیار بهیار محهمهد ئهنوهر هاریكارێ رێڤهبهرێ كومپانیا چرانی ل دور تایبهتمهندیێن بریكاری ژ ههر كهسهكێ دی ئانكو ههر بازرگانهكی دیاردكهت كو ئهگهر كومپانیێ ئێك بریكار ههبیت و ئهو بریكار بهرههمی بهلاڤ بكهت ل وی دهمی دوكاندار ناترسیت ڤی بهرههمی ب رێژهیهكا مهزن بكریت ژ بهركو دزانیت یێ پاراستیه و دزانیت ئهو نرخێ بریكارێ وی ددهتێ دێ ههر ئهو بیت و چ ههڤرك ژبو نینن، بهلێ ئهگهر بزانیت كو ڤێ كومپانیێ دو بریكار ههنه و ههڤركیێ لسهر ڤی بهرههمی دكهن نهشێت باوهریا خو بدهتێ و رێژهكا مهزن ژێ داخواز بكهت، بهلكی ههڤركێ وی ئهرزان تر بێخیته د بازاری دا لهورا ژی دهما كو كومپانیێ ئێك بریكار ههبیت پتر بهرههمێ وێ دهێته فرۆشتن.
ههر دیسان حهجی مهشهود ئهمین دیار كر كو بریكار رادبیت ب رێكخستنا فرۆشتنا بهرههمێ كومپانیێ و د ههمان دهم دا كومپانی یا پێ ئاگههداره كا ئهڤ بهرههمه ب چ نرخ دهێته فرۆشتن و ئهگهر هات و من بهرههمێ وان گران كر، ئهو ژی دێ ژلایێ خۆ ڤه گران كهت یان دێ ل سهر من سهپینت كو ئهز ب بهایهكێ گونجای بفرۆشم، ژلایهكێ دی ڤه دبێژیت: دڤێت تو هنده هزار كارتونێن ڤێ شوكولایێ یان ههر بهرههمێ بیت بفرۆشی ئهگهر هات و من مهرجێ وان بجهئینا ئهڤه دێ من خهلات كهت ئهگهر ژی من بجه نهئینا رهنگه بهایێ بریكاری ل دهڤ كومپانیێ بهێته خوارێ.
ل دور قۆرخكرنا (احتیكار) بهرههمی ژ لایێ بریكارێ ئێكانه ڤه حهجی مهشهود ئهمینی دیار كر كو ب سهدان كومپانیێن بهرههمهینهر ههنه ئهڤ چهنده ژی رێكێ نادهته بریكاری كو قۆرخكرنێ بكهت ئانكو بهرههمێ خۆ ب دلێ خۆ بفرۆشیت و گوت:ئهگهر ههر كومپانیهكێ بریكارێ خۆ ههبیت ئهڤ بریكاره دێ وێ كومپانیێ پارێزیت و دێ فرۆشتنا بهرههمی رێك ئێخیت و بهرههمێ كومپانیێ ب شێوهكێ رێك و پێك ل ههموو باژێرێن وی وهلاتی بهلاڤ كهت.
هاریوان كانیكی دوكاندارهكێ كهل وپهلێن جوانكاریێ یه ل دۆر دابهشكرنا كهل و پهلان ژ لایێ بریكاران ڤه دیار دكهت كو بریكار بهرههمێ خۆ ب نرخهكێ دیار كری د فرۆشیته ههموو دوكانداران بهلێ دهما كو بهرههمهك سهركهفتنێ بدهست خۆ ڤه بینیت و بهێته فرۆشتن دێ بینی ئێكسهر چاڤلێكرنا ڤی بهرههمی كهته بازاری و بریكار نهشێن ب چ رهنگهكی بهرههمێ خۆ بپارێزن، دیسان گوت:خالا ههره گرنگ دڤی بابهتی دا ئهوه كو باج نههێلیت ئهڤ بهرههمه بهێنه د وهلاتی دا و برێكا وێ یهكێ كو بتنێ وێ كومپانیێ بریكارهك یێ ههی نههێلیت كهسێ دی ڤی بهرههمی بێخیته دبازاری دا.
ل دور وان مهرج و بنهمایێن كومپانیێن بیانی تهرخان دكهن بۆ دانا بریكاران، هاریكارێ رێڤهبهرێ كومپانیا چرانی گوت (دهما كو كومپانی بریكارهكێ تایبهت تهرخان دكهت هندهك مهرجان بۆ بهرچاڤ دكهت وهك فرۆشتنا وێ رێژهیا بهرههمی ئهڤا كو پێشبینی دكهت كو ل ڤی وهلاتی دێ هێته فرۆشتن).
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|