|
|
بوهایێ كارێن هونهری ب ههبوونا داهێنانێ ڤه گرێدایه
2010-02-04
دهۆك، بهیارێ زاویتهیی:
|
|
|
هونهرێ شێوهكاری ئێك ژ وان هونهرایه یێ ل ههمی جیهانێ بوهایێ خۆ ههی و خهلك پووتهی ددهتێ، و ل هندهك وولاتان كهڤال ب ملیونێن دولاران دهێنه فروتن هونهرمهندێن وان حهتا حهتایێ د هزرا خهلكی دا د ساخ و نهمرن، ل دهڤهرا دهۆكێ ژی ئهڤ جورێ هونهری كهتیه بزاڤهكا باش و ههژمارهكا زورا هونهرمهندێن شێوهكاری كهتینه د مهیدانا هونهری دا.
بو زانینا رهوشا هونهرێ شێوهكاری ل دهڤهرا دهۆكێ ل دهستپێكێ سیروان شاكر بهرپرسێ پشكا شێوهكاری ل پهیمانگهها هونهرێن جوان دیاركر كو كارهكێ زێده یێ دهێته كرن و حهتا رادهیهكی سهركهفتن د كارێ هونهرێ شێوهكاری دا ههیه، ناڤبری ل وێ باوهریێ بو كو هێشتا یا مای كو ڤی هونهری بكهنه د قوناغهكا باشتر و پێشكهفتی تر دا و ئهڤ چهنده ب ههبونا هزرێن هونهری ڤه گرێدا و دیاركر كو حهتا نوكه هزرێ ب دروستی رولێ خۆیێ دروست د ناڤ هونهری دا نهدیتیه، قوناغا هونهرێ شێوهكاری ل دهڤهرا دهۆك سیروانی ب قوناغهكا باش دا زانین و دیاركر كو هێشتا چاڤلێكرن یا ههی و خۆ قورتالكرن ژ چاڤلێكرنێ ناڤبری ب پێدڤی زانی و دیاركر كو دڤێت ئهڤرۆ بچنه د قوناغا داهێنانێ دا.
سیروان شاكر ئهو ژی دیاركر كو نه ههر كارێ باش چاڤلێكرنه بهلكو دهمێ هونهرمهند ل سهر كارهكێ هونهریێ دروست و جیهانی كاردكهت تایبهتمهندیا وی تێدا دیاردبیت و گوت: ههر كارهكێ پێشكهفتی و زانستی بیت ئهڤرۆ كونترولێ ل سهر جیهانێ دكهت و هونهرێ شێوهكاری ژی كو هونهرمهند ل كیرا دونیایێ بیت دێ شێت ل سهر هزرێ برێڤهچیت بهلێ دێ ههولدهت تایبهتمهندیا خۆ بكاربینیت، ل دووڤ دیتنا هونهرمهند سیروان شاكری ل ههرێما كوردستانێ و دهۆكێ هونهرێ شێوهكاری گههشتیه قوناغهكا باش و پێشكهفتی و بتایبهت د هزرا هونهری دا و دوپاتكر كو دێ ل پاشهرۆژێ تایبهتمهندیا خۆ ههبیت.
ناڤبری ههبونا ستایلێ تایبهت بو هونهرمهندی ب گرنگی زانی و ئهڤ چهنده ژ چاڤلێكرنێ دوور دانا، ستایلێ خۆ سیروانی وهكو نموونه ئینا ول دووڤ گوتنێن وی كو ستایلێ وی یێ تایبهته و ب ڤێ چهندێ دێ شێت بهردهوامیێ دهته خۆ وهكو هونهرمهند ژ بهر كو وهكو كار نه وهكو هزر یێ گرێدایه ب وی بخۆڤه.
سهبارهت چوونا هونهرێ شێوهكاری بو ناڤ جهماوهری وهكو هونهرێ موزیكێ، سیروان شاكر دیاركر كو هونهرێ شێوهكاری شیایه جهێ خۆ ل ناڤ جهماوهری بكهت لێ نه ب رێژهیا موزیكێ و سترانێ و ئهڤ چهنده ب تێگههشتنا خهلكی ڤه گرێدا و گوت: دهمێ ل وولاتهكی تابلویهك ب ملیونێن دولاران دهێته فروتن ئهو كارتێكرنا تێگههشتنا مللهتێ وانه ڤێ چهندێ دكهت و ئهڤه ژی بو وێ یهكێ زڤراند كو هندی مللهت پێشبكهڤن و ههستێن جوان و هشیاریهكا دروست ههبیت دێ پتر بوهایێ تشتی زانن و ئارمانجێن جوانتر ههبن.
ناڤبری هێلا د ستوویێ پاشهرۆژێ دا كو خهلك دكارێ هونهری و داهێنانێ بگههن و ههبونا بوهایی د كارێن هونهری دا ب ههبونا داهێنانێ ڤه گرێدا.
سیروان یێ گهشبین بو كو هونهرێ شێوهكاری وهكو موزیكێ د پێشكهفتنهكا باش دایه ژ بهر كو هزرا خلكی بهرهڤ باشتره و سازیێن هونهری ژی پتر پووتهی ددهنه ڤی هونهری.
ئازاد محهمهد سهعید ماموستایێ پشكا شێوهكاری ل پهیمانگهها هونهرێن جوان ژی دگهل بوچوونا سیروان شاكری بو كو بزاڤا هونهرێ شێوهكاری د رهوشهكا باش دایه و ڤهكرنا پێشانگههێن شێوهكاری وهكو بهلگهیهك ل سهر ڤێ چهندێ دیاركر و گوت: ڤهكرنا پێشانگههێن شێوهكاری ئانكو ههبونا لڤینهكێ د ڤی بواری دا.
ل دور رهوشا هونهرێ شێوهكاری ل قوتابخانێن پارێزگهها دهۆكێ زیاد عابد رێڤهبهرێ چالاكیێن قوتابخانان ل دهۆكێ دیاركر كو د ڤان سێ سالێن بوری دا بزاڤا هونهرێ شێوهكاری د ناڤ قوتابخانهیێن دهۆكێ دا خورت بویه و بهلگه ژی ل سهر ڤێ چهندێ وهكو زیادی دیاركری ئانجامدانا فیستهڤالهكا سهرانسهری بو گشت قوتابخانان و دهستنیشانكرنا باشترین كهڤال ل سهر ئاستێ پارێزگههێ بو فیستهڤالا ههرێما كوردستانێ، ناڤبری ئهو ژی دیاركر كو كهرنهڤال د ناڤ پرانیا قوتابخانان دا ب پشتهڤانیا رێڤهبهریا وان دهێنه ئانجامدان و بهرههمێن قوتابیان دهێنه دروستكرن و ئهڤ چهنده بو دیاركرنا بههرهیێن قوتابیان دهێتهكرن و گوت: ئاڤاكرنا گهلهریێن چالاكییان بو ههمبێزكرنا پێشانگههێن قوتابیێن زیرهك د وارێ شێوهكاری دا ل ههمی قهزایێن پارێزگهها دهۆك و هاریكاریا قوتابیێن بههرهدار، ئهڤه ههمی گروڤه بو باشیا رهوشا هونهرێ شێوهكاری د ناڤ قوتابیان دا و ماموستایێن دهرچوویێن پهیمانگهها هونهرێن جوان رۆلهكێ باش د ڤێ چهندێ دا ههبویه.
گهلهری یا دهۆك ئهو جهه یێ بهردهوام كهڤالێن هونهری لێ دهێنه نیشاندان و سالانه ههژمارهكا زورا هونهرمهندێن كوردستانێ ب بهرههمێن خۆ بهشداریێ تێدا دكهن، ل دور سهرهدانێن خهلكی بو ڤێ گهلهریێ هونهرمهند سهردار كێستهیی وهكو كارمهندێ وێ دیاركر كو ڤهكرنا گهرا 9 یا گهلهریێ ژ گهلهك لایانڤه ژ گهرێن دی باشتره كو 139 هونهرمهندان بهشداری تێدا كریه و ئاستێ هونهری ژی گهلهك باشتره، ژ لایهكێ دی ڤه وهكو سهرداری دیاركری كو سهرهدانێن خهلكی ژی زێدهتر لێ هاتیه بهلێ كرین و فروتنا كهڤالان ههر وهكو خۆیه و ئهڤه ژی ناڤبری بو چهند ئهگهران زڤراند كو هێشتا ل ڤێ دهڤهرێ كرینا كهڤالان نهبویه نهریت د ناڤ خهلكی دا و هێشتا رهوشهنبیریا هونهرێ شێوهكاری و بوهایێ شوون تبلێن هونهرمهندان نه هاتیه زانین و سهرداری گوت: ئهگهر وهلاتی بهرههمێن شێوهكاری نه كریت ما بوچی دهزگههێن میری خۆ فێری كرینا بهرههمێن هونهری ناكهن؟
و ب مخابنی ڤه دیاركر كو ژورێن رێڤهبهریێن میری د ڤالانه ژ تابلو و كهڤالان.
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|