|
|
Untitled 2
|
زانكۆ (مالا مللهتی)یه
د. حهمید باڤی |
|
|
زانكۆ جهێ زانست و زانیاریانه، ئێك ژ ئارمانجێن ههره سهرهكی یێن زانكۆیێ ڤهكۆلین و دووڤچوونێن زانستی نه، كو بزاڤ تێدا دهێتهكرن بۆ گههشتنا راستیێ و پێزانینێن راست و دروست، و پاراستنا كهلتورێ مرۆڤایهتیێ یێ زانستی و شارستانی و ڤهگوهاستنا وی ژ دهستهكێ بۆ دهستهكێ دی.
زانكۆ وهك مهلبهندهكێ ڤهكۆلینێن زانستی بهردهوام كاری دكهت كو جڤاكێ بهرڤ پێشڤهچوونێ بگوهوریت و گهشێ د ناڤ كۆمهلی دا پهیدا بكهت د ههموو بواران دا (هزری، رهوشهنبیری، جڤاكی، ئابوری و سیاسی... هتد). دهمێ زانكۆ دهرچوویێن خوه ئاماده دكهت و ب زانست و زانیاریێن تازه د ههمی بواران دا چهكدار دكهت، ئهوێ دڤێت لهشكهرهكێ زۆر ژ دهرچوویان ئامادهبكهت بۆ گوهورینا جڤاكی بهرهڤ پێش؛
چونكو ئهڤ كهسه دێ بزاڤی كهن ئابۆری پێشبێخن ل دووڤ نهخشێن نوو و پێشكهفتی، كارگێریێ رێكوپێك بكهن، داهاتی ب رهنگهكێ دادپهروهرانه ل سهر هاوهلاتیان بهلاڤهبكهن، ئاستێ رهوشهنبیری بلند بكهن، سیاسهتێ و پهیوهندیێن جۆرا و جۆر ب هێز بێخن و خورت بكهن ژ بۆ بهرژهوهندیا گهل و وهلاتی، ئانكو زانكۆ ههموو كارتێكرنێن كاریگهر یێن رهوشهنبیری و ئابۆری و سیاسی و جڤاكی پێكڤه گرێددهت ژ بۆ خزمهتا وهلاتی و گهشهكرنا گشتی یا كۆمهلێ.
ههروهسان تاكه كهس ژی دێ گهشێ كهت و هێز و شیانێن وی دێ زێده بن ژ بۆ پترلێكرنا داهاتی و دادپهروهركرنا بهلاڤكرنێ، و دیتنا وی دێ هێته گوهورین دهربارا ژیانێ و جڤاكی و كاری دا، كو پتر رێز ل مرۆڤی بهێته گرتن (وَلَقَدْ كَرَّمْنَا بَنِي آدَمَ)، و مافێن وی بهێنه پاراستن، و ههڤكاری و پشتهڤانی د ناڤ رێزێن مللهتی دا بهلاڤه ببیت ل سهر باشیێ و چاكیێ (...وَتَعَاوَنُوا عَلَي الْبِرِّ وَالتَّقْوى وَلَا تَعَاوَنُوا عَلَي الْإِثمِ وَالْعُدْوَانِ...).
زانكۆ رۆلهكێ بهرچاڤ و كاریگهر دبینیت و دگێریت د دانا شیرهتان دا د بوارین جۆرا وجۆر دا، و پهیداكرن و ب دهستئێخستنا پێزانینان، هاریكاریكرن و ئاسانكاریا تهكنیكی بۆ چارهسهریا ئاریشا و ئاستهنگان، زێدهباری پێرابوون و بجهئینانا ڤهكۆلینێن زانستی، و گرێدانا كۆمبوون وكۆنفرانسێن مهشق و راهینانان بۆ فهرمانبهر و كاركهران، ولایهنێن خزمهتگوزاری، و دام و دهزگایێن حكومی، و تهخ و جوونێن جڤاكی یێن جۆرا وجۆر، ئهڤ رهنگه كارانه ژ خزمهتا گشتیا زانكۆیێ یه بۆ كۆمهلی، و هوسا زانكۆ د كهفته د خزمهتا كۆمهلی دا و دبیته (مالا مللهتی).
ئهو گهل و وهلاتێ زانكۆ د ناڤ دا رۆلهكێ كاریگهر دگێریت ئارێشێن خوه ل دووڤ نهخشێن دارێژتی و تازه و ب رهنگێن زانستی چارهسهر دكهن، ژ بهر هندێ پێش دكهڤن و خوه ژ ئاستهنگێن ژیانێ و ئابۆری قورتال دكهن یان بارێ خوه سڤك دكهن، و ژیارا گهلێن خوه خۆش دكهن.
پێدڤیه ل وهلاتێ مه ژی ئهڤ گرنگیه ب زانكۆیێ بهێتهدان، و زانكۆ ژی ڤێ رۆلی بگێریت، دا ئهو كێماسی و ئارێشه و ئاستهنك و دوزێن جڤاكی و گهلی و وهلاتی ههین ب رهنگێن دارێژتی و زانستی بهێنه چارهسهركرن، دا گهل و وهلات پێش بكهڤن و ژ ئێشێن ههژاریێ و نهخوهشیێ و نهزانینێ دوور بكهڤن و قورتال ببن.
پروفیسورێ هاریكار
ك. پهروهردێ ل زاخۆ - زانكۆیا دهۆك
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|