|
|
Untitled 2
|
ئهڤه بوو سهیدایێ من حافز قازی
موسهدهق توڤی |
|
|
دهمێ ل رۆژا 2010/1/17 ژ دهۆكێ ڤه من پهیوهندی ب سهیدایێ خوه حافز قازی ڤهكری ئهو ل نهمسا بوو، ب پهیڤێن خوهیێن هنگڤینی و گرنژینا بهردهوام ل سهر لێڤان و ب وێ هیڤیا ههردهم وی ب ژیانێ ههی، گۆت: موسهدهقێ من، ڤان رۆژان هندهك پشكنین و سهرهدانێن نوژداری من یێن ههین، دێ ب دووماهی هێن ئینشائهللا د دهمهكێ نێزیك دا دێ زڤرمهڤه دهۆكێ و دێ پێكڤه پشكداریێ د ههلبژارتنان دا كهین.
ب وێ هیڤیێ ئهز و سهیدایێ خوه سهیدایێ گشت رهوشهنبیر و نڤیسكار و رۆژنامهڤانێن دهۆكێ، د دهمهكێ نێزیك دا ل ڤی باژێری بگههینه ههڤ، بیرا من ل ئێڤارا 25تیرمهها چوویی رۆژا ههلبژارتنێن پهرلهمانێ كوردستانێ هاتهڤه، دهمێ ئهز ل بنگههێ دهنگدانێ ل خواندنگهها سهرهتاییا سهنا دایكا سیروانی ههڤژینا دلسۆژا سهیدای، ئهو ئافرهتا بۆ ههموویان سهلماندی ل پشت ههر زهلامهكێ مهزن ئافرهتهكا مهزن ههیه، گازی من كری كاك موسهدهق وهره هاری بابێ سیروانی، دهمێ لێ زڤریم من دیت سهیدا ب پیراتی و نهساخی و لاوازیا خوهڤه ب ژیێ ههشتێ سالیێ خوهڤه یێ د تهكسیهكێ دا و ب بالیفكا یا خوه گرتی، یێ هاتی پشكداریێ د ههلبژارتنان دا بكهت، ئهو پهرلهمانێ ب هزارێن وهك وی ب درێژیا ژیێ خوه ل هیڤیێ بوون ههلاتنا وی پهرلهمانی ببینن و دهنگێ خوه بدهنێ، گهلهك ب وێ هیڤیێ شاد نهبوون و هندهكێن دی وهك سهیدای ب چاڤێن خوه پهرلهمانێ كوردستانێ دیت، لهوما ب ههر رهنگهكی بیت نهڤێت ڤێ دهلیڤێ ژ دهست بدهن و بلهزن ڤێ جارێ ژی دهنگێ خوه بدهن، هێژ من نه ئاخفتی سهیدای گۆت ئهگهر ئهز نههێمه دهنگدانێ كی دێ هێت...!!
ب ههر رهنگهكێ ههبیت من و خێرخوازهكی سهیدا دانا سهركورسیهكێ و ب كورسیڤه بره بهر سندوقا دهنگدانێ، سهیدای دهنگێ خوه دا و ژ گرنژینا سهر لێڤێن وی دیاربوو یێ دبێژیت: سوپاس بۆ خودێ ڤێ جارێ ژی من دهنگێ خوهدا پهرلهمانێ كوردستانێ، خوزیێن وێ رۆژێ دهنگێ خوه بدهمه بهربژارێن كوردستانێ بۆ پهرلهمانێ عیراقێ.
ب ڤی رهنگی مه سهیدا برهڤه و كره د تهكسیێ دا و دگهل ههڤژینا خوهیا دلسۆژ بهرهف مال چوون، پشتی چهند رۆژهكان ژی زڤرینهڤه نهمسا.
من ئهڤرۆ سوبههێ دكر چاڤهرێ بووم زهنگا موباییلا من لێدهت، هژمارا 4294805 كو من ب ناڤێ قازی توماركریه بیت و دهنگێ سهیدایێ من بیت و وهك ههرجار دهمێ دگههشته وهلاتی و رۆژا پاشتر تهلهفونا من دكر و دگۆت: موسهدقێ من ئهڤه تو ل كیڤهی..
دێ وهره ئهزێ ژ ته خهریب بوویم، ههر ب ڤی رهنگی ژی یێ بلهز بوو بۆ دیتنا تهڤایی ههڤالان... دهملدهست دا كاركهم، پشتی چهند خولهكهكان ل سهیدایێ خوه بمه مێڤان و ب دیدارا وی شاد بمهڤه.
راسته دهمێ دبێژن تنێ مرن رێكێ ل هیڤیێن مرۆڤی دگریت، ڤێ جارێ سهیدا زڤریڤه دهۆكێ، بهلێ نه ئهز ب دیدارا وی شاد بووم نه ئهو ب دیدارا ههڤالان شاد بوو، ل شوونا دهنگێ موباییلا سهیدای ل دهمژمێر 54:11سپێدهیا 3/4 موباییلا دلسۆژێ سهیدای شڤان عهلی ئادهم ئهز هژاندم دهمێ ب دلهكێ پڕ گریڤه گۆتیه من:
- ته زانیه مامێ حافزێ مری و ل شاخكێ ڤهشارت.. !!
- كورۆ چاوان مامێ حافز یێ ل نهمسا كهنگی مر و كهنگی ئیناڤه... ؟
- نهو پسمام شڤێدی دهمژمێر 08:5 یێ گههشتی و دهمژمێر 11:5 یێ چوویه بهر دلۆڤانیا خودێ و ئهڤرۆ سپێدێ ل شاخكێ یێ ڤهشارتی.
بهلێ تنێ مرن ژ هیڤیێن مرۆڤی مهزنتره، مرنێ نههێلا جارهكا دی دگهل گرنژینا سهر لێڤێن سهیدایێ خوه بگرنژین، مرنێ نههێلا ڤێ جارێ ژی سهیدایێ مه ل بنگههێ خواندنگهها سهنا دهنگێ خوه بدهته بهربژارێن كوردستانێ بۆ پهرلهمانێ عیراقێ.
راسته سهیدا نهگههشته بهر سندوقێن دهنگدانێ، بهلێ وهفاداریا خوه بۆ ڤێ ئاخا پیرۆز دوباره كرهڤه، دوا خولهكێن ژیێ خوه ل كوردستانێ بۆراندن و دوا ههناسهیێن خوه ژ بایێ باژێرێ خوه ههلكێشان، ئهو دهۆكا لاندكا وی هژاندی گیانێ وی ژی دناڤ ئاخا خوهدا ههمبێز كر.
چهند سهیدایێ من یێ ب وهفا بوو بۆ باژێرێ خوه، هند كهسێن وی، قوتابی و ههڤالێن وی ژی ب وهفا درهكهتن بۆ ڤی وهلاتی، ل رۆژا 7 ئادارێ، رۆژا ههلبژارتنان، مزگینی دانه گیانێ وی و گۆتنێ ههرێ شاد به و مه ههموویان ل شوونا ته دهنگێ دای و لیستا ههڤپهیمانیا كوردستانی مهزنترین سهركهتنا ل سهر ئاستێ ههرێمێ بدهستڤه ئینای.
ئهگهر د پهسنا سهیدایێ حافز قازی دا بێژم: رهوشهنبیرهكێ مهزن بوو..
دبیت ئهزێ شاشبم، ئهگهر بێژم نڤیسكارهك یان رۆژنامهڤانهكێ چالاك بوو..
دبیت حهقێ وی نهدهمێ، ئهگهر بێژم كوردپهروهرهكێ ههره مهزن بوو..
دبیت نهگههمه راستیا مهزناتیا سهیدای، چنكو سهیدا مرۆڤهكێ هندێ مهزن بوو ههموو ئهڤ پهسنه: كورد پهروهری، رهوشهنبیری، نڤیسكار و رۆژنامهڤانێ خودان شیان، دلسۆژێ ههڤالان، ههڤالێ ههموو تهخان، دلۆڤانی، خێرخوازی ههمبیزدكرن و هێژ ههمبێزا وی یا بهرفرهه بوو و ب دههان پهسنێن دن یێن مرۆڤایهتی و مرۆڤپهروهری د وێ ههمبێزێ دا ههبوون.
ئهگهر رۆژهكێ ژ من بێته خواستن سهیدایێ خوه دگهل ناڤدارهكێ دی بهراورد بكهم، دێ هند ژ من هێت سهیدایێ خوه دگهل وی بخوه بهراوردبكهم، چنكو كهسهكێ دی ل وی ئاستی نابینم.
بهلێ ئهڤه بوو سهیدایێ من یێ نهمر حافزێ قازی.
|
|
|
|
|
|
|
ههرێما
كوردستانێ _ دهۆك |
|
تهلهفون : 07701472032 -
07501119102 |
|
copyright 2009
© |
evro@evropress.com |
evropress@yahoo.com |
evropress@hotmail.com |
|